Hospitali 4 zashambuliwa Aleppo Syria

Habari kutoka mji wa Aleppo nchjini Syria, zasema kwamba hospitali nne na kituo cha kuhifadhi damu, zimelipuliwa na mabomu kutoka angani.

Vituo vyote vya kimatibabu viko katika maeneo yanayoshikiliwa na waasi mashariki mwa mji huo, na ambao kwa sasa umezingirwa na majeshi yanayounga mkono serikali.

Hijabainika kuhusu ni nani au kundi lipi limehusika katika ulipuaji huo ambapo mtoto mmoja mchanga aliyezaliwa ni miongoni mwa waliouwawa.

Lakini ndege za kivita za majeshi ya Syria zimekuwa zikitekeleza mashambulizi katika mji wa Aleppo kwa miezi kadhaa sasa.