Van Gaal aambulia kichapo Old Trafford

Louis van Gaal aliambulia kichapo cha 2-1 dhidi ya Swansea katika mechi yake ya kwanza ya ligi.

Kocha mpya wa Manchester United Louis van Gaal aliambulia kichapo cha mabao 2-1 dhidi ya Swansea katika mechi yake ya kwanza ya ligi kuu ya Uingereza msimu huu.

Licha ya kushabikiwa na maelfu ya mashabiki alipoingia uwanjani Old Trafford Manchester united iliambulia kichapo cha kwanza tangu mwaka wa 1972.
kocha huyo aliyeiongoza uholanzi kumaliza katika nafasi ya tatu huko Brazil katika Kombe la dunia Van Gaal alijaribu mbinu zote lakini ziliambulia patupu Swansea ilipofaidi makosa ya safu ya Ulinzi ya United kunako dakika ya 28 ya kipindi cha kwanza.

Hii ndiyo ilikuwa kichapo chao cha kwanza tangu 1972

Ukosefu wa mawasiliano kati ya Chris Smalling Blackett na Phil Jones uliathiri mfumo wao wa mechi hiyo.
Hata hivyo ilikuwa bayana kulikuwa na hitilafu mkwaju wa Nathan Dyer ulipomfikia Ki Sung-yueng ambaye hakusita kuufuma kimiani na kumuacha David de Gea asijue afanye nini.
van Gaal alimuingiza Nani kuchukua pahala pake Javi Hernandez na akabadilisha mfumo wa mchezo kuwa ule wa 4-2-3-1 ama ukipenda mfumo wa almasi na mchezo ukabadilika na kuwarejeshea wazalendo wa old trafford matumaini ya kunusuru hadhi yao.
Matumaini yao punde yaliimarika nahodha Wayne Rooney alipocheka na wavu kunako dakika ya 53 na kufanya mambo kuwa 1-1.

Louis van Gaal aliambulia kichapo cha 2-1 dhidi ya Swansea katika mechi yake ya kwanza ya ligi.

Bao hilo liliwaamsha Swansea usingizini na mechi hiyo ikasisimka tena mashambulizi ya United yalipokosa kuzaa matunda huku Swansea nayo ikijaribu kujifurukuta na kufanya mashambulizi dhidi ya united.
Gylfi Sigurdsson alivunja matumaini ya mashabiki wa united alipofunga bao la ushindi kunako dakika ya 72 na kuihakikishia Swansea ushindi wake wa kwanza huko Old Trafford.